राज्यात झालेल्या सत्ता परिवर्तनानंतर मुख्यमंत्री झालेल्या एकनाथ शिंदे यांची पश्चिम महाराष्ट्रातील पहिली सभा मंगळवारी (ता. २ ऑगस्ट) सासवड (ता.पुरंदर) येथे होणार आहे. ती सासवडच्या पालखीतळ मैदानावर होणार आहे. पुरंदर तालुक्यातील आंतरराष्ट्रीय विमानतळ, गुंजवणी प्रकल्प, फुरसुंगी उरुळी पाणी योजना, हवेलीतील गावांचा अवाजवी टॅक्स आणि दिवे येथील राष्ट्रीय बाजार अशा विविध मुद्द्यांची प्रश्‍न मार्गी लागणार असल्याचे शिवतारे यांच्याकडून सांगितले जाते. त्यादृष्टीने सभा व पुरंदर हवेलीत शिंदे यांची भेट महत्त्वाची मानली जाते. सभेला मुख्यमंत्री यांच्यासह शिवसेनेची मुलुखमैदानी तोफ गुलाबराव पाटील, गुवाहाटी फेम आमदार शहाजीबापू पाटील, खासदार श्रीरंग बारणे, माजी खासदार शिवाजीराव आढळराव पाटील असे दिग्गज उपस्थित राहणार आहेत.
राज्यात झालेल्या नाट्यमय घडामोडीनंतर एकनाथ शिंदे यांना मुख्यमंत्रिपदाची लॉटरी लागली. त्यानंतर त्यांच्या पाठीशी माजी आमदारांपैकी सर्वात प्रथम कोण उभे राहिले असेल तर ते म्हणजे पुरंदरचे माजी आमदार विजय शिवतारे. शिवतारे आणि शिंदे यांचे सख्य असल्याने उठावानंतर मध्यस्थी करण्याची तयारीही शिवतारे यांनी दर्शवली होती. दरम्यान, मंगळवारी होणारी सभा पालखीतळ मैदानावर होणार आहे. शिवतारे यांच्या शिवसेना प्रवेशाची २००८ मध्ये उद्धव ठाकरे यांची भव्य सभा याच मैदानावर झाली होती.
शहाजी बापूंच्या भाषणाकडे राहणार लक्ष''काय झाडी, डोंगार आणि हाटील.. सगळं ओक्के...'' डायलॉग फेम शहाजी बापू पाटील यांचे भाषण ऐकायला पुरंदर हवेलीत मोठी उत्सुकता दिसून येत आहे. सेनेची मुलुख मैदानी तोफ गुलाबराव पाटील हेदेखील मैदान गाजवणार, अशी चर्चा तालुक्यातील शिवसैनिकांमध्ये आहे, असे दिलीप यादव म्हणाले. या सभेला मोठ्या संख्येने उपस्थित राहावे, असे आवाहन माजी राज्यमंत्री विजय शिवतारे यांनी केले आहे.02602, 81372
0 टिप्पण्या