पुण्यात एका ११ वर्षांच्या अल्पवयीन मुलीवर तिचे वडील, अल्पवयीन भाऊ, आजोबा, चुलत मामा अशा चौघांनी अत्याचार केल्याची धक्कादायक घटना उघडकीस आली आहे.
बंडगार्डन परिसरातील एका इंग्लिश माध्यमाच्या शाळेत केलेल्या समुपदेशनातून हा प्रकार उघडकीस आला आहे.
याबाबत २९ वर्षांच्या समुपदेशक महिलेने बंडगार्डन पोलिस ठाण्यात तक्रार दिली आहे. त्यानुसार पोलिसांनी पीडित मुलीचे वडील, भाऊ, आजोबा, चुलत मामा यांच्याविरुद्ध गुन्हा दाखल केला आहे. पोलिसांनी दिलेल्या माहितीनुसार, पीडित मुलगी बंडगार्डन परिसरातील एका इंग्रजी माध्यमाच्या शाळेत शिकते. तक्रारदार महिला समुपदेशक म्हणून काम करतात. विद्यार्थ्यांना मार्गदर्शन करण्यासाठी त्या शाळेत गेल्या होत्या. मुलींना 'गुड टच, बॅड टच' याविषयी माहिती देत होत्या. त्यावेळी या मुलीने आपल्यावर गेल्या चार वर्षांपासून झालेल्या अत्याचाराची माहिती दिली. ही मुलगी २०१७ मध्ये बिहारमध्ये असताना तिच्या वडिलांनी घरात कोणीही नसताना तिच्यावर जबरदस्तीने लैंगिक अत्याचार करण्याचा प्रयत्न केला. त्यानंतर नोव्हेबर २०२० मध्ये घरी तिच्या मोठ्या भावाने अनेक वेळा लैंगिक अत्याचार केला. जानेवारी २०२१ मध्ये तिच्या आजोबांनी तिच्याशी गैरवर्तन केले, तर मे २०२१ मध्ये चुलत मामाने गैरवर्तन केल्याचे मुलीने सांगितले.
सहायक पोलिस निरीक्षक सविता सपकाळे तपास करीत आहेत.
0 टिप्पण्या