वन विभागात केलेल्या माहिती अधिकारात समाधानकारक माहिती न देता उलट अधिकाऱ्यांकडून अपमानित करून कार्यालयाच्या बाहेर हाकलून दिल्यामुळे एका माजी सरपंचाने गळफास घेऊन आत्महत्या करण्याचा प्रयत्न केला. मात्र याच वेळी उपस्थित काही लोकांची नजर पडली आणि त्यांनी तात्काळ धाव घेत माजी सरपंचाला आत्महत्या करण्यापासून रोखल्याने मोठा अनर्थ टळला. ही घटना पैठण तालुक्यातील धरण परिसरात घडली असून काकासाहेब झिरपे ( वय ६५, रा कोळगाव ता. शेवगाव ) असे माजी सरपंचाचे नाव आहे.
मिळालेल्या माहितीनुसार, अहमदनगर जिल्ह्यातील शेवगाव तालुक्यात मोठ्या प्रमाणावर वृक्षतोड करून अवैद्य लाकडी मिलमध्ये राजरोसपणे मौल्यवान लाकूड विक्री करण्यात येत असल्यामुळे, झिरपे यांनी अधिकृत व अनाधिकृत लाकडी मिलची माहिती शेवगाव -पाथर्डी संयुक्त असलेल्या वनविभागाच्या कार्यालयात माहिती अधिकार अधिनियमनुसार अर्ज देऊन मागीतिली होती. मात्र संबंधित विभागाच्या कर्मचाऱ्यांनी झिरपे यांना समाधानकारक माहिती न देता कार्यालयातून बाहेर हाकलून दिल्यामुळे अपमानित झाल्यामुळे नैराश्यापोटी झिरपे यांनी आत्महत्या करण्याचा निर्णय घेतला होता.
त्यामुळे झिरपे यांनी पैठण येथील जायकवाडी धरणात उडी मारून आत्महत्या करण्याचे नियोजन करून गुरुवारी रोजी चार वाजेच्या सुमारास धरण परिसर गाठलं. पण याचवेळी धरण पाहण्यासाठी आलेल्या पर्यटकांची गर्दी असल्यामुळे झिरपे यांनी आपला निर्णय बदलत, नवीन दोरी विकत घेत धरणाच्या खाली असलेल्या वडाच्या झाडाला दोरखंडाने फाशी घेण्याचा प्रयत्न केला. मात्र याचवेळी तेथून जाणार्‍या काही लोकांना झिरपे आत्महत्या करण्याचा प्रयत्न करत असल्याचे दिसून आल्याने त्यांनी तात्काळ धाव घेत त्यांना थांबवलं,त्यामुळे मोठा अनर्थ टळला.
झिरपे यांना उपस्थित लोकांनी आत्महत्या करण्यापासून रोखत,पैठण पोलीसांना याची माहिती दिली. माहिती मिळताच पोलीस निरीक्षक किशोर पवार यांनी घटनास्थळी धाव घेतली. तसेच झिरपे यांना पोलीस ठाण्यात आणून त्यांची समजूत काढली. त्यानंतर नातेवाईकांशी संपर्क करून बोलावून घेतले. माहिती मिळताच झिरपे यांची पत्नी तात्काळ पैठण पोलीस ठाण्यात आल्या आणि त्यानंतर आपल्या पतीला गावाकडे घेऊन गेल्या
0 टिप्पण्या