४ वर्षीय डुग्गू ९ दिवसांनी सापडला...!

११ जानेवारी रोजी सकाळी दहाच्या सुमारास  बालेवाडी  हायस्ट्रीट जवळील पाठशाळा परिसरातून एका चार वर्षीय अल्पवयीन मुलाचं अपहरण झाले होते. अपहरणकर्ते गोड बोलून मुलाला दुचाकीवर बसवून घेऊन गेले होते. संबंधित घटना सीसीटीव्ही कॅमेऱ्यात कैद झाली होती.

स्वर्णव सतीश चव्हाण असं या चार वर्षीय मुलाचं नाव असून तो ११ जानेवारी रोजी सकाळी दहाच्या आपल्या एका लहानग्या मित्रासोबत शाळेत जात असताना त्याचवेळी दुचाकीवरून आलेल्या एका तरुणानं त्याचं अपहरण केलं. अपहरण होऊन आठ दिवस उलटल्यानंतरही अपहरणकर्त्यांचा खंडणीसाठी कोणताही फोन आला नाही. त्यामुळे या प्रकरणाचं गूढ वाढले होते. आज अखेर नऊ दिवसांनी चिमुकला सापडला.बालेवाडी परिसरात अपहरण झालेला चार वर्षीय मुलगा आज ९ दिवसानंतर पिंपरी चिंचवड शहरातील पुनावळे भागात सापडला. डॉक्टर दाम्पत्याच्या या मुलाला पोलिसांनी शोधून काढले.घटनेचा बोभाटा झाल्यानंतर घाबरलेल्या अपहरणकर्त्यांनी स्वत:च त्याची सुटका करून पळ काढला असावा, असा संशय पोलिसांना आहे. स्वर्णवचं अपहरण कुणी केलं ? आणि ९ दिवस तो कुठे होता ? याबाबत अद्याप कोणतीही माहिती पोलिसांना मिळाली नाही.पुणे पोलिसांकडून चिमुकल्याची चौकशी केल्यानंतर या अपहरण नाट्याचा उलगडा होण्याची शक्यता आहे. तब्बल नऊ दिवसांनी स्वर्णव सुखरुप सापडल्याने कुटुंबाच्या जीवात जीव आला आहे. पोलिसांनी स्वर्णवची त्याच्या आई वडिलांशी भेट घडवून दिली आहे.विशेष म्हणजे स्वर्णवच्या वडिलांनी आपल्या काळजाच्या तुकड्याला सोडवण्यासाठी अपहरकर्त्याने मागेल ते देण्याची घोषणा केली होती. त्यांनी सोशल मीडियावर 'मागाल ते देतो, माझ्या काळजाच्या तुकड्याला सोडा' असं आवाहन अपहरणकर्त्यांना केलं होतं. आज अखेर त्यांचा मुलगा सापडला आहे.